விழிப்பு

விழிப்பு 1. உபதேசமற்ற மௌனம் ஆழ்ந்த விழிகளில் விழிப்பு சூன்யவெளிக்கு அப்பால் மனம். 2. அரச இலைகள் அசைந்து அசைந்து பௌர்ணமி நிலவொளி நிழல் புத்தனின் மௌனம் எங்கும் வியாபித்து... 3. யாருமில்லாத குகைக்குள் யாரோ இருந்தார்கள் இன்றுவரை அங்கு யாருமில்லை. 4. நேற்று என்னைக் காண வந்தார் அப்பொழுது அங்கில்லை நான் இன்று வருவாரோ புத்தன். ந க துறைவன்.

பௌர்ணமி

சித்திரா பௌர்ணமி நாளில்
சித்ரகுப்தன் சந்நதியில் ஆஜராகி
மக்கள் தரிசனம்.

இன்று சித்ரகுப்தன் ஓய்வாய்
கணக்கு எழுதுவதை நிறுத்திவிட்டு
மக்களை ஆசிர்வாதிக்கிறார் மௌனமாய்...

ந க துறைவன்.

மனுஷி

மனுஷி 1. சாந்தமான முகத்தில் ஒளி வனதுர்க்கையின் ராகு கால தரிசனம் அக்கணம் அழியுமோ ஆணவம். 2. ஆண்மைத் திமிரில் அட்டகாசம் நெருங்கிய காமுகர்களைத் தனித்து வதம் செய்தாள் மகிஷாசுரமர்த்தினி. 3. காமவெறி பிடித்த மிருகங்கள் போரில் வென்று வீழ்த்தினாள் உக்கிர மகரிஷியின் சூலத்தின் கீழ் அசுர பிணம். 4. அசுர ஆணவத்தை அழித்தாள் பெண் குலத்தைக் காத்தாள் கற்பு காத்த கனகதுர்க்கை. 5. துஷ்டர்களை அழித்த கை துக்கத்தை ஒழித்த கை பெண்மை காத்த துர்க் கை. 6. வானுக்கு அப்பால் பூமிக்கு அப்பால் உள்ளவளே என்னுள் நீயே ஆன்மாவாய்... 7. ரத்த பீஜர்கள் சிந்திய ரத்தத் துளிகள் பட்டுத் தெறித்த ஈரம் துர்க்கையின் சிவப்பு ஆடை. 8. வன்கோபம் தணித்து மோனம் அடையாளமாய் ரத்தத்துளிகள் அணிந்தாள் நெற்றி திலகம். 9. அசுர கணங்களுக்கு அவள் உக்கிரதேவி உபாசகர்களுக்கு அவள் வாக்தேவி எனக்கு அவளே இஷ்ட தேவி. 10. அசுர கணங்களுக்கு அவள் மகிஷி மங்கையர் குலத்திற்கு அவள் மனுஷி. ந க துறைவன்.

தனிமை

மூன்று தலைமுறையாய் ஏரிக்கரையில் கம்பீரமாய் நிற்கிறது ஒற்றை பனைமரம். ந க துறைவன்.

வரவேற்பு

பூ, காய், பழமென

வேம்பு பூத்துக்குலுங்குகிறது

தமிழ் புத்தாண்டு வரவேற்று...

ந க துறைவன்.

பாதை

இன்றைய எட்டு வழிச் சாலைகள்
கடந்த கால மனிதன் நடந்து
பழகிய ஒற்றையடி பாதை.

ந க துறைவன்.